യു.ജി.സി നെറ്റ് ഒക്ടോബർ സെഷൻ പരീക്ഷയുടെ പുതുക്കിയ ഷെഡ്യൂൾ പ്രസിദ്ധീകരിച്ചു. മറ്റൊരു പരീക്ഷയുടെ അതേ തീയതിയിൽ വന്നതിനാൽ പരീക്ഷ മാറ്റിവെക്കാൻ നിരന്തരമായി ആവശ്യമുയർന്നിരുന്നു. ഇത് കണക്കിലെടുത്താണ് പുതിയ ഷെഡ്യൂൾ പുറത്തു വിട്ടത്.
നേരത്തെ ഒക്ടോബർ 6 മുതൽ 11 വരെയായിരുന്നു പരീക്ഷ നടത്താൻ നിശ്ചയിച്ചിരുന്നത്. ഡിസംബർ 2020, ജൂലൈ 2021 സെഷനുകൾ ചേർത്താണ് ഒക്ടോബറിൽ പരീക്ഷ നടത്താൻ തീരുമാനിച്ചിരിക്കുന്നത്. ഒക്ടോബർ 10ന് മറ്റൊരു പ്രധാനപ്പെട്ട പരീക്ഷയുള്ളതിനാലാണ് പരീക്ഷ മാറ്റാൻ ആവശ്യമുയർന്നത്.
പുതിയ ഷെഡ്യൂൾ പ്രകാരം രണ്ട് ഘട്ടങ്ങളിലായി നെറ്റ് പരീക്ഷ നടക്കും. ആദ്യ ഘട്ടം ഒക്ടോബർ 6 മുതൽ 8 വരെയും രണ്ടാം ഘട്ടം ഒക്ടോബർ 17 മുതൽ 19 വരെയുമായിരിക്കും. ഒക്ടോബറിലെ പരീക്ഷയ്ക്കായുള്ള രജിസ്ട്രേഷൻ പുരോഗമിക്കുകയാണ്. നേരത്തെ രജിസ്റ്റർ ചെയ്തിട്ടുള്ളവർ വീണ്ടും അപേക്ഷിക്കേണ്ടതില്ല.
അപേക്ഷിക്കാത്തവർക്ക് സെപ്റ്റംബർ 6 വരെ യു.ജി.സി നെറ്റിന്റെ ഔദ്യോഗിക വെബ്സൈറ്റായ ugcnet.nta.nic.in സന്ദർശിച്ച് അപേക്ഷിക്കാം.
