നീറ്റ് പരീക്ഷയെഴുതാന്‍ തയ്യാറെടുക്കുന്ന ചില വിദ്യാര്‍ത്ഥികളുടെ പരീക്ഷാ കേന്ദ്രത്തില്‍ മാറ്റം വന്നിട്ടുണ്ട്. കൊവിഡ് 19 ന്റെ പശ്ചാത്തലത്തിലാണ് മാറ്റം വന്നത്. ഇവര്‍ക്ക് എസ്.എം.എസ് ആയോ ഇമെയില്‍ ആയോ ഫോണ്‍ കോള്‍ വഴിയോ വിവരങ്ങള്‍ നല്‍കിയിട്ടുണ്ടെന്ന് നാഷണല്‍ ടെസ്റ്റിങ് ഏജന്‍സി(എന്‍.ടി.എ) അറിയിച്ചു. പുതുക്കിയ അഡ്മിറ്റ് കാര്‍ഡ് ntaneet.nic.in എന്ന വെബൈസൈറ്റില്‍ നിന്ന് ഡൗണ്‍ലോഡ് ചെയ്യാവുന്നതാണ്.
പരീക്ഷാ കേന്ദ്രത്തില്‍ മാറ്റമുണ്ടാവുമെങ്കിലും ആദ്യം ലഭിച്ച നഗരത്തില്‍ തന്നെയായിരിക്കും പുതിയ കേന്ദ്രവും എന്ന് എന്‍.ടി.എ അറിയിച്ചിട്ടുണ്ട്. കേരളത്തിന് പുറമെ ആസാം, ഗുജറാത്ത്, മഹാരാഷ്ട്ര, തമിഴ് നാട്, ജാര്‍ഖണ്ഡ് തുടങ്ങിയ സംസ്ഥാനങ്ങളിലെ ചില പരീക്ഷാ കേന്ദ്രങ്ങളില്‍ മാറ്റം വന്നിട്ടുണ്ട്.
സെപ്റ്റംബര്‍ 13നാണ് രാജ്യമെമ്പാടുമുള്ള വിദ്യാര്‍ത്ഥികള്‍ നീറ്റ് യു.ജി 2020 പരീക്ഷയെഴുതുന്നത്. 15 ലക്ഷത്തോളം വിദ്യാര്‍ത്ഥികള്‍ പരീക്ഷയ്ക്കായി രജിസ്റ്റര്‍ ചെയ്തിട്ടുണ്ട്. സുരക്ഷാ മാനദണ്ഡങ്ങള്‍ പാലിച്ചായിരിക്കും പരീക്ഷ നടത്തുക.
