പെൺകുട്ടികൾക്ക് സൈന്യത്തിൽ നഴ്സാകാൻ സുവർണ്ണാവസരം: ബിഎസ്സി നഴ്സിങ് കോഴ്സിന് ഇപ്പോൾ അപേക്ഷിക്കാം!

രാജ്യസേവനം ആഗ്രഹിക്കുന്ന പെൺകുട്ടികൾക്ക് സായുധ സേനയിൽ ഒരു മികച്ച കരിയർ നേടാനുള്ള സുവർണ്ണാവസരം ഒരുങ്ങുന്നു. ആംഡ് ഫോഴ്സസ് മെഡിക്കൽ സർവീസസിലെ (എഎഫ്എംഎസ്) നഴ്സിങ് കോളേജുകളിലെ ബിഎസ്സി നഴ്സിങ് കോഴ്സ് 2025-26 പ്രവേശനവിജ്ഞാപനം ഇന്ത്യൻ ആർമി പുറത്തിറക്കി. നാല് വർഷം ദൈർഘ്യമുള്ള ബിഎസ്സി നഴ്സിങ് ബിരുദം നേടി എഎഫ്എംഎസിൽ കമ്മിഷൻഡ് റാങ്കോടെ നഴ്സ് ആകാൻ ഈ പ്രോഗ്രാം അവസരമൊരുക്കുന്നു.

കോളേജുകളും സീറ്റുകളും

രാജ്യത്തുടനീളമുള്ള ആറ് നഴ്സിങ് കോളേജുകളിലായി ആകെ 220 സീറ്റുകളിലേക്കാണ് പ്രവേശനം. പ്രധാനപ്പെട്ട കോളേജുകളും അവിടുത്തെ സീറ്റുകളും താഴെ നൽകുന്നു:

• ആംഡ് ഫോഴ്സസ് മെഡിക്കൽ കോളേജ് (എഎഫ്എംസി), പുണെ – 40 സീറ്റ്.
• കമാൻഡ് ഹോസ്പിറ്റൽ ഈസ്റ്റേൺ കമാൻഡ് (സിഎച്ച് (ഇസി)), കൊൽക്കത്ത – 30 സീറ്റ്.
• ഇന്ത്യൻ നേവൽ ഹോസ്പിറ്റൽ ഷിപ്പ് (ഐഎൻഎച്ച്എസ്) അശ്വിനി, മുംബൈ – 40 സീറ്റ്.
• ആർമി ഹോസ്പിറ്റൽ റിസർച്ച് ആൻഡ് റഫറൽ (എഎച്ച് (ആർ ആൻഡ് ആർ)), ന്യൂഡൽഹി – 30 സീറ്റ്.
• കമാൻഡ് ഹോസ്പിറ്റൽ സെൻട്രൽ കമാൻഡ് (സിഎച്ച് (സിസി)), ലഖ്നൗ – 40 സീറ്റ്.
• കമാൻഡ് ഹോസ്പിറ്റൽ എയർ ഫോഴ്സ് (സിഎച്ച് (എഎഫ്)), ബെംഗളൂരു – 40 സീറ്റ്.

പ്രവേശന യോഗ്യതകൾ

ഈ കോഴ്സുകളിലേക്ക് പെൺകുട്ടികൾക്ക് മാത്രമാണ് പ്രവേശനം. അവിവാഹിതരായവർക്കും, വിവാഹബന്ധം വേർപെടുത്തിയവർക്കും, നിയമപരമായി വേർപിരിഞ്ഞവർക്കും, എൻകംബറൻസ് ഇല്ലാത്ത വിധവകൾക്കും അപേക്ഷിക്കാം. അപേക്ഷകർ 2000 ഒക്ടോബർ 1-നും 2008 സെപ്റ്റംബർ 30-നും ഇടയിൽ (രണ്ട് ദിവസങ്ങളും ഉൾപ്പെടെ) ജനിച്ചവരായിരിക്കണം.

റെഗുലർ വിദ്യാർത്ഥിയായി, ഇംഗ്ലീഷ്, ഫിസിക്സ്, കെമിസ്ട്രി, ബയോളജി (ബോട്ടണിയും സുവോളജിയും) എന്നിവ പഠിച്ച് ആദ്യ ശ്രമത്തിൽ തന്നെ പ്ലസ്ടു (10+2) അഥവാ തത്തുല്യ പരീക്ഷ, മൊത്തം 50 ശതമാനം മാർക്കോടെ അംഗീകൃത ബോർഡിൽ നിന്ന് ജയിച്ചിരിക്കണം. മെഡിക്കൽ ഫിറ്റ്നസ്/ഫിസിക്കൽ സ്റ്റാൻഡേർഡ്സ് വ്യവസ്ഥകൾ വിജ്ഞാപനത്തിൽ വിശദമായി നൽകിയിട്ടുണ്ട്.

അപേക്ഷാ സമർപ്പണം

joinindianarmy.nic.in എന്ന വെബ്സൈറ്റ് വഴി  ജൂൺ 30-ന് രാത്രി 11 മണി വരെ രജിസ്റ്റർ ചെയ്യണം. ആവശ്യപ്പെട്ടിട്ടുള്ള രേഖകളുടെ സ്കാൻ ചെയ്ത കോപ്പികൾ നിശ്ചിത സൈസിലും ഫോർമാറ്റിലും ആക്കി അപ്ലോഡ് ചെയ്യണം. സബ്മിറ്റ് ബട്ടൺ ക്ലിക്കു ചെയ്യുന്നതിനു മുൻപ്, അപേക്ഷയിൽ നൽകിയ വിവരങ്ങളിൽ ആവശ്യമായ തിരുത്തലുകൾ നടത്താൻ അവസരമുണ്ട്.

പട്ടിക വിഭാഗക്കാരൊഴികെയുള്ളവർ (അവർക്ക് ബാധകമായ രേഖ അപ്ലോഡ് ചെയ്യണം) പ്രോസസിങ് ഫീസായി 200 രൂപ ഓൺലൈൻ ആയി അടയ്ക്കണം. തുടർന്ന് ബാങ്ക് റഫറൻസ് നമ്പർ, കൺഫർമേഷൻ പേജ് എന്നിവ ലഭിക്കും. അപേക്ഷയുടെയും കൺഫർമേഷൻ പേജിന്റെയും പ്രിൻ്റൗട്ടുകൾ ഭാവിയിലെ റഫറൻസിനായി എടുത്തുവെക്കണം.

പ്രവേശന നടപടികൾ

നാല് വർഷത്തെ കോഴ്സിലേക്കുള്ള പ്രവേശനം പ്രധാനമായും നാഷണൽ എലിജിബിലിറ്റി കം എൻട്രൻസ് ടെസ്റ്റ് – അണ്ടർ ഗ്രാഡ്വേറ്റ് (നീറ്റ് യുജി) 2025 സ്കോർ, കമ്പ്യൂട്ടർ ബേസ്ഡ് ടെസ്റ്റ് ഓഫ് ജനറൽ ഇൻ്റലിജൻസ് ആൻഡ് ജനറൽ ഇംഗ്ലീഷ് (TOGIGE), സൈക്കോളജിക്കൽ അസസ്മെൻറ് ടെസ്റ്റ് (PAT), ഇൻ്റർവ്യൂ, മെഡിക്കൽ ഫിറ്റ്നസ്, ഓരോ കോളേജിലെയും ഒഴിവുകൾ എന്നിവയുടെ അടിസ്ഥാനത്തിലായിരിക്കും. പ്രവേശനം തേടുന്നവർ നീറ്റ് യുജി 2025-ൽ യോഗ്യത നേടിയിരിക്കണം.

നീറ്റ് യുജി മെറിറ്റ് (സ്കോർ/റാങ്ക്) പരിഗണിച്ച് ഷോർട്ട് ലിസ്റ്റ് ചെയ്യും. ഷോർട്ട് ലിസ്റ്റ് ചെയ്യപ്പെടുന്നവർ, ഡൽഹി കൻ്റോൺമെൻ്റ് ബേസ് ഹോസ്പിറ്റലിൽവെച്ച് നടക്കുന്ന സ്ത്രീനിങ് പ്രോസസ്സിൽ പങ്കെടുക്കണം. സ്ത്രീനിങ്ങിൽ അർഹത നേടുന്നവരുടെ ഷോർട്ട് ലിസ്റ്റ് joinindianarmy.nic.in ൽ പ്രസിദ്ധീകരിക്കും. പട്ടികയിൽ ഉൾപ്പെടുന്നവരെ TOGIGE; PAT, ഇൻ്റർവ്യൂ, മെഡിക്കൽ പരിശോധന എന്നിവയ്ക്കായി വിളിക്കും.

TOGIGE ഒരു കമ്പ്യൂട്ടർ അധിഷ്ഠിത പരീക്ഷയായിരിക്കും, രണ്ട് മാർക്ക് വീതമുള്ള 40 മൾട്ടിപ്പിൾ ചോയ്സ് ചോദ്യങ്ങളുണ്ടാകും. 30 മിനിറ്റ് ദൈർഘ്യമുള്ള ഈ പരീക്ഷയിൽ ഉത്തരം തെറ്റിയാൽ അര മാർക്ക് വീതം നഷ്ടപ്പെടും. PAT, ഇൻ്റർവ്യൂ എന്നിവ ഷോർട്ട് ലിസ്റ്റ് ചെയ്യപ്പെടുന്നവർക്ക് ബോർഡ് ഓഫ് ഓഫീസേഴ്സിന്റെ മുന്നിൽവെച്ച് നടക്കും. പന്ത്രണ്ടാം ക്ലാസ് വരെയുള്ള കോർ വിഷയങ്ങൾ, ജനറൽ നോളജ്, കറൻ്റ് അഫയേഴ്സ്, വിദ്യാർത്ഥിനിയുടെ താത്പര്യങ്ങൾ, ഹോബികൾ തുടങ്ങിയവയുമായി ബന്ധപ്പെട്ട ചോദ്യങ്ങൾ പ്രതീക്ഷിക്കാം. വിവിധ തലങ്ങളിലെ സ്പോർട്സ് നേട്ടങ്ങൾക്കും വെയ്റ്റേജ് ലഭിക്കും. സേനകളിൽ സേവനത്തിലുള്ള എക്സ് സർവീസ് വിഭാഗ/മുന്നേറ്റത്തിൽ മരണമടഞ്ഞ ഓഫീസർമാർ, ജെസിഒമാർ, അദർ റാങ്ക്സ് എന്നിവരുടെ ആശ്രിതർക്കും അർഹമായ വെയിറ്റേജ് നൽകും.

മെഡിക്കൽ ഫിറ്റ്നസിനു വിധേയമായി നീറ്റ് യുജി സ്കോർ, TOGIGE സ്കോർ, സൈക്കോളജിക്കൽ അസസ്മെൻ്റ് ആൻഡ് ഇൻ്റർവ്യൂ എന്നിവയുടെ സംയുക്ത മെറിറ്റ് പരിഗണിച്ചായിരിക്കും അന്തിമ തിരഞ്ഞെടുപ്പ്.

ആനുകൂല്യങ്ങളും ബോണ്ട് വ്യവസ്ഥകളും

പരിശീലനകാലത്ത് സൗജന്യ റേഷൻ, താമസം, യൂണിഫോം അലവൻസ്, പ്രതിമാസ സ്റ്റൈപ്പൻഡ് എന്നിവ ലഭിക്കും. തിരഞ്ഞെടുക്കപ്പെടുന്നവർ, കോഴ്സ് ജയിച്ചശേഷം മിലിട്ടറി നഴ്സിങ് സർവീസ് (എംഎൻഎസ്) ഓഫീസറായി എഎഫ്എംഎസിൽ കമ്മിഷൻഡ് റാങ്കിൽ സേവനം അനുഷ്ഠിക്കാൻ ബാധ്യസ്ഥരാണ്. പ്രവേശന സമയത്ത് അതിലേക്ക് ബോണ്ട് നൽകണം.

കോഴ്സിൽ നിന്നുമുള്ള പിൻവാങ്ങൽ, പരിശീലനം അവസാനിപ്പിക്കൽ, നൽകുന്ന എംഎൻഎസ് കമ്മിഷൻ നിരാകരിക്കൽ എന്നീ സാഹചര്യങ്ങളിൽ ബോണ്ട് തുക വിദ്യാർത്ഥിനി നൽകേണ്ടി വരും. പരിശീലനകാലത്തിന് ആനുപാതികമായ തുക നൽകണം. പ്രവേശനം നേടി ഏഴ് ദിവസം കഴിഞ്ഞ് പഠനം ഉപേക്ഷിക്കുന്നവർക്ക് മുഴുവൻ ബോണ്ട് തുകയും നൽകേണ്ടി വരും.

വിശദാംശങ്ങൾക്കായി joinindianarmy.nic.in ലെ വിജ്ഞാപനം പരിശോധിക്കുക.