ശുഭ ചിന്ത : തനതായ മികവ് കണ്ടെത്താം

രാവിലെ വരാന്തയിലിരുന്നു പത്രം വായിക്കുകയായിരുന്നു അയാൾ. അക്ഷരങ്ങൾ കാണാൻ വളരെയധികം ബുദ്ധിമുട്ടുന്നുണ്ട്. പത്രം ദൂരെ പിടിക്കുന്നു, അടുത്തു പിടിക്കുന്നു, കണ്ണട ശരിയാക്കി വയ്ക്കുന്നു.

ഇതെല്ലാം കണ്ട വഴിപോക്കൻ പറഞ്ഞു: കണ്ണട മാറ്റാറായിട്ടുണ്ടാകും; അതാ ഒന്നും കാണാത്തത്.

അതുകേട്ട് വീട്ടുകാരൻ പറഞ്ഞു: എനിക്കു പത്രം വായിക്കാൻ കണ്ണടയുടെ ആവശ്യമില്ല. അല്ലാതെ തന്നെ വായിക്കും.

അമ്പരപ്പോടെ വഴിയാത്രക്കാരൻ ചോദിച്ചു: പിന്നെന്തിനാണു പത്രംകൊണ്ടു സർക്കസ് കാണിക്കുന്നത്….?

വീട്ടുകാരൻ പറഞ്ഞു: രാവിലെ നടക്കാനിറങ്ങിയപ്പോൾ വഴിയിൽകിടന്നു കിട്ടിയ കണ്ണടയാണ്. എങ്ങനെയെങ്കിലും എനിക്ക് ഉപയോഗിക്കാൻ പറ്റുമോ എന്നു നോക്കിയതാണ്.

അപരനു യോജ്യമായതെല്ലാം എനിക്കും ഇണങ്ങണമെന്ന ചിന്ത, ഒട്ടേറെ ജീവിതങ്ങളെ അർഥശൂന്യമാക്കിയിട്ടുണ്ട്.