പെട്ടന്നുള്ള ലാഭം തേടുമ്പോൾ ചതിക്കുഴികൾ കാത്തിരിക്കുന്നു!

മനുഷ്യൻ്റെ അത്യാഗ്രഹം പലപ്പോഴും അവനെ ചതിക്കുഴികളിലേക്ക് നയിക്കാറുണ്ട്. പെട്ടെന്ന് പണമുണ്ടാക്കാനുള്ള മോഹത്തിൽ, തങ്ങളുടെ കയ്യിലുള്ളതെല്ലാം നഷ്ടപ്പെടുത്തുന്ന നിരവധി സംഭവങ്ങൾ നമ്മുടെ ചുറ്റും നടക്കുന്നുണ്ട്. ഈ ദുരവസ്ഥയിലേക്ക് നമ്മെ എത്തിക്കുന്നത് എങ്ങനെയെന്ന് ഒരു കഥയിലൂടെ നമുക്ക് മനസ്സിലാക്കാം.

ഒരു ദിവസം ഒരാൾ തൻ്റെ ആടിനേയും പിടിച്ചുകൊണ്ട് വഴിയിലൂടെ നടക്കുകയായിരുന്നു. ഒരു കള്ളൻ അയാളുടെ പിറകെ ചെന്ന് തക്കം പാർത്ത് ആടിൻ്റെ കയർ അറുത്ത് ആടിനേയും കൊണ്ട് കടന്നുകളഞ്ഞു.

സംഭവിച്ചത് എന്താണെന്ന് മനസ്സിലാക്കിയ ആട്ടുടമ ആടിനെ തിരക്കിനടന്ന് ഒരു കിണറിനരികിലെത്തി. അവിടെ ആകെ നിരാശ ബാധിച്ച ഒരു മനുഷ്യനെ അയാൾ കണ്ടു. എന്നാൽ തൻ്റെ ആടിനെ മോഷ്ടിച്ച കള്ളനാണ് അതെന്ന് അയാൾ അറിഞ്ഞതേയില്ല. നിരാശയുടെ കാരണം തിരക്കിയപ്പോൾ കള്ളൻ പറഞ്ഞു:

“എൻ്റെ പണസഞ്ചി കിണറ്റിൽ വീണുപോയി. അതിനകത്ത് അഞ്ഞൂറ് വെള്ളി നാണയങ്ങളുണ്ട്. കിണറ്റിൽ ചാടി പണസഞ്ചി എടുത്തു തരാമെങ്കിൽ നിനക്ക് ഞാൻ നൂറ് വെള്ളിനാണയങ്ങൾ തരാം.”

ഒരു വാതിൽ അടയുമ്പോൾ മറ്റൊരു വാതിൽ തുറന്നേക്കാം എന്നായിരുന്നു ആടിനെ നഷ്ടപ്പെട്ടയാളുടെ ചിന്ത. തനിക്ക് നഷ്ടപ്പെട്ട ആടിനെ അപേക്ഷിച്ച് എത്രയോ ലാഭകരമായ അവസരമാണിത് എന്നയാൾ മനസ്സിൽ കരുതി. കണ്ണടച്ച് വിശ്വസിക്കാവുന്ന ഒരു ഓഫറായിരുന്നില്ല അത്. എന്നിട്ടും ആ അഞ്ഞൂറ് വെള്ളി നാണയങ്ങളിൽ അയാൾ മതിമറന്നു.

പിന്നെ ഒട്ടും വൈകിയില്ല, വസ്ത്രങ്ങളെല്ലാം അഴിച്ചുവെച്ച് അയാൾ കിണറ്റിലേക്ക് ചാടി. അപ്പോഴേക്കും കള്ളൻ അയാളുടെ വസ്ത്രങ്ങളുമായി കടന്നുകളഞ്ഞു. ആടിനെ നഷ്ടപ്പെട്ടയാൾക്ക് സ്വന്തം വസ്ത്രങ്ങളും നഷ്ടപ്പെട്ടു.

---

മോഹന വാഗ്ദാനങ്ങളും ചതിക്കുഴികളും

ഇക്കാലത്തും പല മനുഷ്യരും ഇത്തരം ചതിക്കുഴികളിൽ ചെന്നുപെടാറുണ്ട്. കൈയ്യിലുള്ള പണം പലമടങ്ങ് വർദ്ധിപ്പിച്ചു തരാമെന്ന മോഹന വാഗ്ദാനങ്ങളിൽ വിശ്വസിച്ച്, തങ്ങൾ കഷ്ടപ്പെട്ടുണ്ടാക്കിയ സമ്പാദ്യം മുഴുവൻ തട്ടിപ്പുകാർക്ക് കാഴ്ചവെക്കുന്നവർ ഏറെയാണ്. ഓഹരി വിപണികളിലും ക്രിപ്റ്റോ കറൻസികളിലും, മറ്റ് ഓൺലൈൻ പ്രോഗ്രാമുകളിലും നിക്ഷേപിച്ച് ഇരട്ടി ലാഭമുണ്ടാക്കാമെന്ന് വ്യാമോഹിച്ച് സർവ്വ സമ്പാദ്യങ്ങളും, എന്തിന്, കടമെടുത്തു പോലും തട്ടിപ്പുകാരുടെ കൈകളിലേക്ക് എത്തിക്കുന്നവർ നിരവധിയാണ്.

“അത്യാഗ്രഹം നാശത്തിലേക്ക് നയിക്കുന്നു” എന്ന് പൗരാണികർ പറയാറുണ്ട്. അത്യാഗ്രഹം മനുഷ്യൻ്റെ യുക്തിപരമായ ചിന്തയെ ഇല്ലാതാക്കുന്നു. എത്ര ഉയർന്ന ഔദ്യോഗിക പദവികളിൽ ഉന്നത സ്ഥാനം വഹിച്ചിരുന്നവരും വിദ്യാസമ്പന്നർ എന്ന് അഭിമാനിക്കുന്നവരുമൊക്കെ സാമൂഹ്യ മാധ്യമങ്ങളിലൂടെയുള്ള ഇത്തരം തട്ടിപ്പുകൾക്ക് തലവെച്ചു കൊടുക്കാറുണ്ട്. കാരണം, പണം പെട്ടെന്ന് ഇരട്ടിയാക്കാമെന്ന മോഹം അവരുടെ യുക്തിയെ മറികടക്കുന്നു.

മനുഷ്യൻ്റെ ദുരാഗ്രഹങ്ങൾക്ക് സ്വയം കടിഞ്ഞാണിടാത്തിടത്തോളം കാലം ഇത്തരം തട്ടിപ്പുകൾ തുടർന്നുകൊണ്ടേയിരിക്കും. ഒടുവിൽ സർവ്വതും നഷ്ടപ്പെട്ട് നിലയില്ലാക്കയത്തിൽ ചാടി വീണതിന് ശേഷമായിരിക്കും ബോധമുദിക്കുക. എന്നാൽ, അപ്പോഴേക്കും സമയം ഒരുപാട് വൈകിയിരിക്കും.

---

വിവേകത്തോടെ മുന്നേറാം

അത്യാഗ്രഹത്തെ നിയന്ത്രിക്കുകയും വിവേകത്തോടെ തീരുമാനങ്ങൾ എടുക്കുകയും ചെയ്യേണ്ടത് അത്യാവശ്യമാണ്. “പെട്ടെന്ന് പണക്കാരനാകാനുള്ള വഴികളില്ല” എന്ന് ഓർക്കുക. ഏതൊരു നിക്ഷേപവും നടത്തുന്നതിന് മുൻപ് അതിനെക്കുറിച്ച് ആഴത്തിൽ പഠിക്കുക. വിദഗ്ദ്ധരുടെ അഭിപ്രായം തേടുക. അമിതമായ വാഗ്ദാനങ്ങൾ നൽകുന്ന പദ്ധതികളിൽ സംശയം തോന്നിയാൽ അതിൽ നിന്ന് വിട്ടുനിൽക്കുക.

നഷ്ടം സഹിച്ചാൽ പോലും, കൈയ്യിലുള്ളത് സുരക്ഷിതമാക്കാൻ ശ്രമിക്കുക. അത്യാഗ്രഹം ഒരു രോഗമാണ്, അതിനെ നിയന്ത്രിക്കാൻ കഴിഞ്ഞാൽ പല ദുരന്തങ്ങളിൽ നിന്നും നമുക്ക് രക്ഷപ്പെടാൻ കഴിയും. “ധനം നിങ്ങളെ സന്തോഷവാനാക്കില്ല, ധനം എങ്ങനെ ഉപയോഗിക്കുന്നു എന്നതിലാണ് സന്തോഷം.”

ഈ ശുഭദിനത്തിൽ, അത്യാഗ്രഹത്തിൻ്റെ കെണികളിൽ വീഴാതെ, വിവേകത്തോടെയും ജാഗ്രതയോടെയും നമ്മുടെ ജീവിതത്തിലെ തീരുമാനങ്ങൾ എടുക്കാൻ നമുക്ക് കഴിയട്ടെ എന്ന് ആശംസിക്കുന്നു.