നീറ്റ് യു.ജി. 2025 കൗൺസലിംഗിനുള്ള രജിസ്ട്രേഷൻ, ഫീസ് അടയ്ക്കൽ, ഓപ്ഷൻ സമർപ്പിക്കൽ എന്നിവയുടെ പ്രധാന നിബന്ധനകൾ. റൗണ്ടുകളുടെ നിയമങ്ങളും സമയക്രമവും.

 മെഡിക്കൽ കൗൺസലിങ് കമ്മിറ്റി (MCC) നടത്തുന്ന അഖിലേന്ത്യാ നീറ്റ് യു.ജി. 2025 അലോട്ട്മെന്റ് പ്രക്രിയ ആരംഭിച്ച സാഹചര്യത്തിൽ, വിദ്യാർത്ഥികൾ കൗൺസലിംഗ് സംബന്ധിച്ച പ്രധാന നിബന്ധനകളും സമയക്രമവും കൃത്യമായി മനസ്സിലാക്കേണ്ടത് അത്യാവശ്യമാണ്. ഓരോ റൗണ്ടിനും അതിൻ്റേതായ നിയമങ്ങളുണ്ട്. ഇവ പാലിച്ചില്ലെങ്കിൽ പ്രവേശനം നഷ്ടപ്പെടാനും സെക്യൂരിറ്റി ഡിപ്പോസിറ്റ് കണ്ടുകെട്ടാനും സാധ്യതയുണ്ട്.

◼️ അഖിലേന്ത്യാ ക്വോട്ടാ സീറ്റുകളും പ്രവേശനവും

എം.ബി.ബി.എസ്./ബി.ഡി.എസ്./ബി.എസ്സി. നഴ്സിങ് പ്രോഗ്രാമുകളിലെ നിശ്ചിത സീറ്റുകളിലേക്കാണ് ഈ അലോട്ട്മെന്റ് വഴി പ്രവേശനം.

▪️ 15% അഖിലേന്ത്യാ ക്വോട്ടാ സീറ്റുകൾ: രാജ്യത്തുള്ള എല്ലാ സർക്കാർ മെഡിക്കൽ/ഡെൻ്റൽ കോളേജുകളിലെയും 15% സീറ്റുകൾ, എല്ലാ എയിംസ് (AIIMS), ജിപ്മർ (JIPMER) സ്ഥാപനങ്ങളിലെയും 100% സീറ്റുകൾ, ഡീമ്ഡ് സർവകലാശാലകൾ (Deemed Universities), കേന്ദ്ര സർവകലാശാലകൾ, ഇ.എസ്.ഐ.സി. (ESIC) പോലുള്ള സ്ഥാപനങ്ങളിലെ 100% സീറ്റുകൾ എന്നിവ ഈ അലോട്ട്മെൻ്റിൽ ഉൾപ്പെടും.
▪️ ബാക്കിയുള്ള 85% സീറ്റുകൾ സംസ്ഥാന ക്വോട്ടയിലാണ് ഉൾപ്പെടുന്നത്.

◼️ കൗൺസലിംഗ് പ്രക്രിയയും പ്രധാന നിബന്ധനകളും

കൗൺസലിംഗിൽ പങ്കെടുക്കുന്നതിന് mcc.nic.in എന്ന വെബ്സൈറ്റിൽ രജിസ്ട്രേഷൻ നടത്തി നിശ്ചിത തുക (രജിസ്ട്രേഷൻ ഫീസ്, സെക്യൂരിറ്റി ഡിപ്പോസിറ്റ്) അടയ്ക്കേണ്ടത് ആദ്യപടിയാണ്.

▪️ ആദ്യ റൗണ്ട് രജിസ്ട്രേഷൻ അവസാനിക്കുന്ന തീയതി: 2025 ജൂലൈ 28.
▪️ അതിനുശേഷം ഓപ്ഷൻ രജിസ്ട്രേഷൻ നടത്തണം. ചോയ്സുകൾ സമർപ്പിക്കാത്തവരുടെ അപേക്ഷ പരിഗണിക്കില്ല.

◼️ സെക്യൂരിറ്റി ഡിപ്പോസിറ്റ്: എത്ര പണം അടയ്ക്കണം?

വിവിധ വിഭാഗക്കാർക്കും സ്ഥാപനങ്ങൾക്കും സെക്യൂരിറ്റി ഡിപ്പോസിറ്റിൽ വ്യത്യാസമുണ്ട്:

▪️ സർക്കാർ/കേന്ദ്ര സർവകലാശാലകൾ (അഖിലേന്ത്യാ ക്വോട്ടാ): 

▪️ പൊതുവിഭാഗം/ഒ.ബി.സി./ഇ.ഡബ്ല്യു.എസ്. : ₹10,000 (രജിസ്ട്രേഷൻ ഫീസ്) + ₹1,00,000 (റീഫണ്ടബിൾ സെക്യൂരിറ്റി ഡിപ്പോസിറ്റ്) = ആകെ ₹1,10,000 

▪️ എസ്.സി./എസ്.ടി./പി.ഡബ്ല്യു.ഡി. : ₹500 (രജിസ്ട്രേഷൻ ഫീസ്) + ₹5,000 (റീഫണ്ടബിൾ സെക്യൂരിറ്റി ഡിപ്പോസിറ്റ്) = ആകെ ₹5,500 

▪️ ഡീമ്ഡ് സർവകലാശാലകൾ:
▪️ എല്ലാ വിഭാഗക്കാർക്കും: ₹5,000 (രജിസ്ട്രേഷൻ ഫീസ്) + ₹2,00,000 (റീഫണ്ടബിൾ സെക്യൂരിറ്റി ഡിപ്പോസിറ്റ്) = ആകെ ₹2,05,000 

◼️ റൗണ്ടുകളുടെ നിയമങ്ങൾ ശ്രദ്ധിക്കാം

ഓരോ റൗണ്ടിലെയും നിയമങ്ങൾ വളരെ പ്രധാനമാണ്.

▪️ ആദ്യ റൗണ്ടിൽ സീറ്റ് ലഭിച്ചിട്ടും ചേരാതിരുന്നാൽ: സെക്യൂരിറ്റി ഡിപ്പോസിറ്റ് നഷ്ടമാകും. രണ്ടാം റൗണ്ടിൽ പങ്കെടുക്കാൻ കഴിയില്ല. എന്നാൽ, മൂന്നാം റൗണ്ടിൽ പുതിയ രജിസ്ട്രേഷൻ നടത്തി പങ്കെടുക്കാം. 

▪️ ആദ്യ റൗണ്ടിൽ സീറ്റ് ലഭിച്ച് ചേർന്നാൽ: രണ്ടാം റൗണ്ടിൽ പങ്കെടുക്കാം. രണ്ടാം റൗണ്ടിൽ പുതിയ അലോട്ട്മെൻ്റ് ലഭിക്കുകയാണെങ്കിൽ, നിലവിലുണ്ടായിരുന്ന അലോട്ട്മെൻ്റ് റദ്ദാകും, പുതിയ അലോട്ട്മെൻ്റിൽ ചേരണം. 

▪️ രണ്ടാം റൗണ്ടിൽ സീറ്റ് ലഭിച്ചിട്ടും ചേരാതിരുന്നാൽ: സെക്യൂരിറ്റി ഡിപ്പോസിറ്റ് നഷ്ടമാകും. 

▪️ രണ്ടാം റൗണ്ടിൽ സീറ്റ് ലഭിച്ച് ചേർന്നാൽ: പിന്നീട് രാജിവെക്കാനോ പിന്മാറാനോ കഴിയില്ല. നിർബന്ധമായും പ്രവേശനം തുടരണം. 

▪️ ഡീമ്ഡ് സർവകലാശാലകളിൽ: സീറ്റ് ലഭിച്ചിട്ടും ചേരാതിരുന്നാൽ സെക്യൂരിറ്റി ഡിപ്പോസിറ്റ് കണ്ടുകെട്ടും. 

▪️ ബി.എസ്സി. നഴ്സിങ് പ്രോഗ്രാമുകൾ: എല്ലാ റൗണ്ടുകളിലും പ്രവേശനം നേടിയവർ നിർബന്ധമായും കോളേജിൽ ചേരണം. അല്ലാത്തപക്ഷം സെക്യൂരിറ്റി ഡിപ്പോസിറ്റ് കണ്ടുകെട്ടും.

◼️ നീറ്റ് യു.ജി. 2025: കൗൺസലിംഗ് സമയക്രമം

▪️ ആദ്യ അലോട്ട്മെൻ്റ് ഫലം: 2025 ജൂലൈ 31-ന് പ്രഖ്യാപിക്കും. 

▪️ കോളേജ്/സ്ഥാപന റിപ്പോർട്ടിംഗ്: 2025 ഓഗസ്റ്റ് 6 വരെ അവസരമുണ്ടാകും. 

▪️ രണ്ടാംഘട്ടം ആരംഭം: 2025 ഓഗസ്റ്റ് 12. 

▪️ രണ്ടാം അലോട്ട്മെൻ്റ് ഫലം: 2025 ഓഗസ്റ്റ് 21-ന് പ്രസിദ്ധീകരിക്കും. 

▪️ മൂന്നാംഘട്ട അലോട്ട്മെൻ്റ് നടപടി: 2025 സെപ്റ്റംബർ 3 മുതൽ 8 വരെ. 

▪️ മൂന്നാം അലോട്ട്മെൻ്റ് ഫലം: 2025 സെപ്റ്റംബർ 11-ന്. 

▪️ ഓൺലൈൻ സ്ട്രേ വേക്കൻസി റൗണ്ട്: 2025 സെപ്റ്റംബർ 22-ന് തുടങ്ങും. ഫലം 27-ന് പ്രഖ്യാപിക്കും. 

▪️ സംസ്ഥാനതല അലോട്ട്മെൻ്റ് നടപടി: 2025 സെപ്റ്റംബർ 30-ന് ആരംഭിച്ചേക്കും. 

▪️ ക്ലാസുകൾ ആരംഭം: 2025 സെപ്റ്റംബർ 1-ന്.

എല്ലാ വിദ്യാർത്ഥികളും നിർദ്ദേശങ്ങൾ ശ്രദ്ധാപൂർവ്വം വായിച്ച് അവസാന നിമിഷം വരെ കാത്തുനിൽക്കാതെ അപേക്ഷാ നടപടികൾ പൂർത്തിയാക്കുക. കൂടുതൽ വിവരങ്ങൾക്ക് mcc.nic.in എന്ന വെബ്സൈറ്റ് സന്ദർശിക്കുക.

English Summary:

The NEET UG 2025 All India Quota counseling process has commenced, with Round 1 registration closing on July 28. Students must pay a security deposit (₹1,00,000 for General/OBC, ₹5,000 for SC/ST for Government seats; ₹2,00,000 for Deemed Universities) and fill choices. Specific rules apply for each round regarding joining, seat forfeiture, and re-registration. The first allotment result is due July 31, with classes starting September 1. Candidates must strictly follow the MCC guidelines on mcc.nic.in.

📅 Last Day Reminder