മറ്റുള്ളവർ ദുഃഖിക്കുമ്പോൾ എനിക്കെങ്ങനെ സന്തോഷിക്കാനാകും? ഒരു ആഫ്രിക്കൻ പാഠം 🌍💙

🌱പ്രഭാത ചിന്തകൾ – കൂടിച്ചേരലിന്റെ സന്തോഷം🌱

വിജയിക്കാൻ വേണ്ടി മാത്രം ഓടുന്ന ഒരു ലോകത്താണ് നമ്മൾ ജീവിക്കുന്നത്. എന്നാൽ, വിജയം ഒറ്റയ്ക്കല്ല, എല്ലാവർക്കും ഒപ്പമാണ് വേണ്ടതെന്ന് നമ്മളെ ഓർമ്മിപ്പിക്കുന്ന ഒരു മനോഹരമായ കഥയാണിത്.

ഒരിക്കൽ ഒരു നരവംശശാസ്ത്രജ്ഞൻ (Anthropologist) ആഫ്രിക്കയിലെ ഒരു ഗോത്രഗ്രാമത്തിലെത്തി. അവിടുത്തെ കുട്ടികളുടെ സ്വഭാവം പഠിക്കുന്നതിനായി അദ്ദേഹം ഒരു ചെറിയ കളി നിർദേശിച്ചു.

അദ്ദേഹം ഒരു മരച്ചുവട്ടിൽ രുചികരമായ പഴങ്ങൾ നിറച്ച ഒരു വലിയ കൂട വെച്ചു. അതിനുശേഷം കുട്ടികളെ നൂறு മീറ്റർ അകലെ നിർത്തിയിട്ട് പറഞ്ഞു:

“റെഡി… വൺ, ടൂ, ത്രീ, ഗോ! ആര് ആദ്യം ആ മരച്ചുവട്ടിൽ എത്തുന്നുവോ, അവർക്ക് ഈ പഴക്കൂട മുഴുവനായി സ്വന്തമാക്കാം.”

ഒരു മത്സരം തുടങ്ങുന്ന ആവേശത്തോടെ കുട്ടികൾ കുതിച്ചുപായും, ഒരാൾ വിജയിക്കും, ബാക്കിയുള്ളവർ നിരാശരാകും എന്നൊക്കെയാണ് അദ്ദേഹം കരുതിയത്.

പക്ഷേ, സംഭവിച്ചത് മറ്റൊന്നായിരുന്നു!

ആ കുട്ടികളിൽ ആരും തനിയെ ഓടിയില്ല. അവർ പരസ്പരം കൈകൾ കോർത്തുപിടിച്ചു. എന്നിട്ട് എല്ലാവരും ചേർന്ന് ഒറ്റക്കെട്ടായി ആ മരച്ചുവട്ടിലേക്ക് ഓടി. അവിടെയെത്തി, ആ പഴക്കൂടയിലെ പഴങ്ങൾ എല്ലാവരും സമമായി പങ്കിട്ടെടുത്തു, ഒരുമിച്ച് ഇരുന്ന് സന്തോഷത്തോടെ കഴിച്ചു.

അത്ഭുതപ്പെട്ടുപോയ ആ ശാസ്ത്രജ്ഞൻ കുട്ടികളോട് ചോദിച്ചു: “നിങ്ങളിൽ ഒരാൾക്ക് ഓടിവന്ന് ആ പഴങ്ങൾ മുഴുവനായും സ്വന്തമാക്കാമായിരുന്നില്ലേ? എന്തിനാണ് നിങ്ങൾ അത് പങ്കുവെച്ചത്?”

ആ കുട്ടികൾ ഒരേ സ്വരത്തിൽ പറഞ്ഞു: “ഉബുണ്ടു (Ubuntu)”.

അതെന്താണെന്ന് അദ്ദേഹം ചോദിച്ചപ്പോൾ, അതിലൊരു കുട്ടി നൽകിയ മറുപടി ഇതായിരുന്നു:

“മറ്റുള്ളവർ ദുഃഖിതരായിരിക്കുമ്പോൾ, ഞങ്ങളിൽ ഒരാൾക്ക് മാത്രമായി എങ്ങനെ സന്തോഷിക്കാൻ കഴിയും?”

എന്താണ് ഉബുണ്ടു?

‘ഉബുണ്ടു’ എന്ന ആഫ്രിക്കൻ വാക്കിന്റെ അർത്ഥം വളരെ ആഴത്തിലുള്ളതാണ്: “ഞാൻ ഉള്ളത്, നമ്മൾ ഉള്ളതുകൊണ്ടാണ്” (I am because we are).

ഇന്നത്തെ ലോകം നമ്മോട് പറയുന്നത് ‘നീ ജയിക്കണം, നീ മുന്നിലെത്തണം, മറ്റുള്ളവരെ തോൽപ്പിക്കണം’ എന്നാണ്. അവിടെ ‘ഞാൻ’ എന്ന ഭാവത്തിനാണ് മുൻതൂക്കം. എന്നാൽ ഉബുണ്ടു നമ്മെ പഠിപ്പിക്കുന്നത്, സന്തോഷം എന്നത് ഒറ്റയ്ക്ക് അനുഭവിക്കേണ്ട ഒന്നല്ല, മറിച്ച് പങ്കുവെക്കുമ്പോൾ മാത്രം പൂർണ്ണമാകുന്ന ഒന്നാണ് എന്നാണ്.

ഇന്നത്തെ ചിന്ത:

നമുക്ക് ഒറ്റയ്ക്ക് വേഗത്തിൽ ഓടാൻ കഴിഞ്ഞേക്കും, പക്ഷേ ഒരുമിച്ച് നടന്നാലേ കൂടുതൽ ദൂരം പിന്നിടാൻ കഴിയൂ. ജീവിതം ഒരു മത്സരമല്ല, അതൊരു യാത്രയാണ്. കൂടെയുള്ളവരെയും ചേർത്തുപിടിച്ച് മുന്നോട്ട് പോകുമ്പോഴാണ് ആ യാത്ര മനോഹരമാകുന്നത്.

ഈ ഒരു ചിന്ത നമ്മുടെ ഓഫീസിലും, കുടുംബത്തിലും, സമൂഹത്തിലും കൊണ്ടുവരാൻ നമുക്ക് സാധിക്കണം. ‘എനിക്ക് എന്ത് കിട്ടും?’ എന്നതിന് പകരം ‘നമുക്ക് ഒരുമിച്ച് എങ്ങനെ വളരാം?’ എന്ന് ചിന്തിക്കാം.

നമുക്ക് ‘ഉബുണ്ടു’ ഉള്ളവരാകാം. കാരണം, നിങ്ങൾ ഉള്ളതുകൊണ്ടാണ് ഞാൻ ഉള്ളത്.

📢 ഈ സന്ദേശം ഇഷ്ടപ്പെട്ടെങ്കിൽ:

കൂടുതൽ പ്രചോദനാത്മകമായ കഥകൾക്കും ചിന്തകൾക്കും ഞങ്ങളുടെ WhatsApp കമ്മ്യൂണിറ്റിയിൽ ചേരൂ..

📅 Last Day Reminder